鄧炳強尋日再次指監獄中有人以髮夾同朱古力建立勢力，危害國家安全^。
用朱古力去招攬追隨者，可能你姓鄧嘅呢個字頭就係用朱古力去收𡃁嘅，但監房嘅做法係即使招攬都係要俾煙先埋到枱。點解叫「埋枱」，係因為食飯嘅時候係分唔同「公司」坐，通常佢哋呢啲有「公司」嘅人每月都會拎煙出嚟買嘢食，例如有晚飯時候嘅菜。點解有菜俾人買？因為佢哋扣起咗其他人應該食嘅份量，再拎去賣。
除咗呢樣要俾煙之外，星期日同紅日呢啲大衛Day仲會每人夾份拎唔同嘅材料去整野食，包括監房蛋糕或者夾煙買外籍囚友嘅食物去做炒飯，因為外籍囚友嘅食物係好味啲。呢幾日都有人講監房新年有雞髀食，中秋有月餅食，但無背景嘅人通常都係要被迫賣走自己隻雞髀或者月餅，因為有「公司」嘅人要嚟送禮俾裡面啲大佬，所以如果你拒絕佢哋就會搞鳩你。唔好天真以為中秋呢啲節日係好日，因為佢哋可能有額外嘅嘢嚟搞鳩你。所以一方面斂財，喺監獄製造特權嘅係一直收煙嘅黑社會，鄧炳強話係用朱古力建立勢力簡直係無稽之談。
另外，鄧炳強更提到有人利用公務探訪「通風報訊」，叫手足繼續抗爭。公務探訪嘅房係監房唯一對外通訊而無錄音嘅地方，根本上係可以暢所欲言，但依家鄧炳強就點名批評公務探訪係通風報訊，更話有人講啲煽動性嘅言論，咁即係好可能喺公務探房室裝咗錄音器材，並將一啲正常嘅資訊向牆入面傳播都誣衊成喺監房內散播危害國家安全嘅種子。我哋想同鄧炳強仲有港共講，直到光復之前我哋都唔會放棄抗爭，無論牆內定牆外嘅手足都好，我哋都會團結、堅持直至重光，一息尚存抗爭到底。