大律師公會嘅專業喺一個鐘頭之內被港共迅速摧毀、被政治凌駕，《2021年法律執業者(修訂)條例草案》今日極速完成二讀、三讀，容許律政司嘅律政人員，毋需轉為大律師同只要完成三個月實習就可以獲委任為「資深大律師」[1]。
由大律師到成為資深大律師通常需要累積接近或超過20年經驗，仲要喺行內有足夠能力同聲望先有機會被終審法院首席法官任命成資深大律師，但依家修例後只要為政權服務三個月就可以有呢個銜頭。大律師公會曾經發出聲明指唔能夠接受律政司嘅修例建議，條例忽略委任制度，同資深大律師獨立嘅形象背道而馳 [2]。條例入面仲提到，如果律政人員獲委任後想繼續使用個名銜，就只能一直為港共賣命。
阿豬阿狗只要效忠政權，為港共服務就可以換嚟相等大律師至少十年嘅打拼同專業知識嘅銜頭，根本唔可以同真正經驗充足嘅資深大律師相提並論，佢哋只係政府嘅走狗。港共將政治同司法專業掛勾，一邊打壓律師指責佢哋「不搞專業只搞政治」，一邊利用權力凌駕、漠視其他專業嘅制度。今次嘅修例明顯反映到港共再次以政權去令自己人得益，以權謀私。以後仲有幾多個專業可以獨善其身，唔會比港共滲透？
資料來源：
[1] https://thestandnews.page.link/qQPwsd4qyobJ8szG9
[2] https://thestandnews.page.link/bjk2qFTqsVFwRntt7