【太平紳士巡視 有要求投訴舉手】



每當有人巡視監房,班柳記就會講:「太平紳士巡視,有要求投訴舉手。」


今日港共公佈新獲委任太平紳士名單,當中包括鄧炳強獲委任官守太平紳士^。而根據港共嘅講法,太平紳士主要係巡視任何羈押院所,確保有效管理,無人受到不公平對待或者被剝削權利,確保個別人士所作嘅投訴會有公平同具透明度嘅方式處理。


鄧炳強呢啲人都做到太平紳士真係得啖笑。喺監房入面,如果有任何不滿,你係絕對唔可以喺監督或者太平紳士巡視嘅時間舉手,因為咁樣係玩鳩啲職員,亦都即係玩鳩自己,所以你只可以同你嘅「期數老細」講。當佢拆唔掂,就去搵其他「老職」去處理,而「老職」入面保安部係惡晒,有人玩嘢真係會喺保安室門口罰企。


咁你可能仲會問有申訴專員表格㗎,議員探訪同屋企人朋友探訪都可以有人幫你發聲。首先,好似上次篇文咁講,申訴專員表格放咗喺「老細」枱,所有要拎表就點都會有人知。即使無人睇到你拎表,所有寄出嘅信都有機會俾人拆開,特別係政治犯嘅手足,因為驚佢哋亂講嘢。而親友探訪,基本上係所有對外嘅溝通都係有錄音錄影,只要講錯嘢一係就「老職」自己搞,如果係單位恰你,咁就會同返嗰個單位講,再恰得勁啲。最後係議員探訪,喺之前仲可以探訪嘅時候,你同議員講嗰時候的確係無人知。不過當個議員為你出聲,到頭嚟啲「老職」同單位又會搵你算帳,最後所有問題都係無人講,更加唔好話解決。


監房入面充斥住各種權力,所以無論點樣巡視根本都唔會有人舉手話有問題,成個制度都係一場show。


^資料來源:

https://thestandnews.page.link/2KECEhHkms1QsZWX9

42 次查看0 則留言

最新文章

查看全部