今日懲教署話接獲消息指院所內有人建立勢力，參與集體對抗行動，當中包括前區議員袁嘉蔚^。
監房本身就係一個囚禁咗大量黑社會嘅地方。喺社運發生之前，好人好者又點會坐監？喺監房入面，黑社會呢三個字係禁語嚟，所以佢哋會以「公司」代稱。每一個「期數」(即係工作地方，例如廚房、洗衣房)，每間「公司」都會有「B仔」（即係公司負責人），而「期數老細」（即懲教職員）有唔少都有黑社會背景，當中大部分都係藍絲，只有極少量係黃。
懲教職員為咗方便管理，利用權力、利益同「B仔」進行交易，暗地裡默許黑社會存在同幫手「管理」在囚人士。黑社會勢力無處不在，「公司」每月都會輪流收倉煙、洗衫煙等，而懲教就隻眼開隻眼閉，公然允許呢啲事發生。明明洗衫食飯都係在囚人士嘅基本權利，但只要你唔交煙，「公司」就會唔落柔順劑，食飯就唔落油鹽糖比你。
除此之外，你又知唔知原來連工作分配都係比黑社會包攬晒？你想做廚房同洗衫呢啲收煙荀位？得，擺低最少60萬港紙就可以喺「公司」度買個位，之後佢哋就會同懲教傾調「期數」。你無「公司」照咩？「B仔」就會分配所有下欄嘢，包括洗廁所，拖地，派水比你做。「公司」喺監房發展到成個網絡咁，連洗衫食飯都比佢哋控制曬，咁大勢力懲教又唔管？唔管不特止，監房伙食難食人人都知，懲教職員仲會提供三文治，奶茶同餐蛋麵等，甚至係麥當勞魚柳包比「B仔」喺無CCTV嘅職員房尊享，比特權佢哋享用到出面嘅「美食」。
現實同電影一樣，黑社會喺監房有一定勢力同權力，而呢啲懲教全部都知，只不過佢哋選擇放任、包庇黑社會，因為黑社會對懲教有一定用處。大家唔好唔記得懲教都係狗，而警黑合作係平常不過嘅事嚟，監房又點會例外啊。所以當懲教想打壓社運人士，黑社會就大派用場，懲教就會利用權力外判呢啲揦鮓嘢比「公司」去做。所以今次懲教話打擊院所內任何非法活動喎，佢哋咪就係犯法行為嘅始作俑者囉。
^資料來源：
https://www.info.gov.hk/gia/general/202109/02/P2021090200711.htm