【授權票咁大件事無人講】



香港律師會近日接連被人民日報,鄭若驊同鄭月娥狙擊,指如果繼續觸及政治就會終止關係 [1]。律師會將會喺下星期二進行改選,分別由5位「建制派」、4位「開明派」同2位立場未明嘅候選人競逐 5 個理事席位。


我哋手頭上有一份由香港律師會發出嘅通函,入面竟然有教學去「教」啲律師點樣投授權票。聲稱會守護專業、維護香港法治嘅律師會竟然喺佢哋內部嘅通函詳細解說投授權票嘅方法,並無提及親身投票呢個選項,蓄意將授權票正常化。由此可見,利用授權票制度進行種票呢樣嘢係所有律師同大律師都司空見慣 [2],甚至現任會長彭韻僖都曾經明目張膽咁向律師會會員以電郵推介5名心水候選人進行拉票,全部都唔係「開明派」,同時提議各位可以授權佢代投 [3]。


授權票嘅原意係令一啲唔能夠抽空、親身投票嘅人去授權他人幫助自己投票。但係喺共產黨嘅統治下,一個原本希望人人都可以投到神聖一票嘅制度被肆意濫用,淪為「種票」工具。


正正係因為授權票呢個制度,所以每次律師會理事席位都一直被建制佔多數,開明派反而只能佔少數。律師樓高層會利用權力向員工施壓,令佢哋為咗保住份工「自願」提供授權票,嚴重影響選舉公平性。


律師會已經被中共滲透,喺過往幾年改選都會出現所謂「建制推薦名單」,甚至係「中聯辦心水候選人」。而過往結果同數據正正充分反映授權票對選舉結果有關鍵作用,上年改選中聯辦名單候選人嘅得票當中,分別取得2952至3103票,而當中授權票佔得票率約六成半,前年更大幅佔得票率近七成。相反,開明派候選人嘅授權票僅佔得票率5% [4]。


呢個問題存在多年,但飽讀法律、堅稱會守護專業,爭取民主嘅律師反而都對呢個漏洞視而不見,直至呢一刻都並無改革、完善制度嘅想法。中共恐嚇律師會唔好搞政治,但佢地實質就喺背後操縱,將一切政治化,賊喊捉賊。因此,為咗防止共產黨操控、左右選舉結果,授權票制度必須全面廢除,令每一位選民可以行使自由意志,投出神聖一票,徹底剿滅中共嘅滲透。


資料來源:

[1] https://bit.ly/3j3bdQ6

[2] https://www.hkba.org/content/rules-regulations

[3] https://bit.ly/3sxokfr

[4] https://bit.ly/3y5P5c2

8 次查看0 則留言

最新文章

查看全部