今年學校開始以公民社會發展科取締通識科，早前教育局就公社科準備共 12 份教學簡報 [1]，當中提及到支那向香港供水問題，形容為「國家見到香港市民喺生活上面對困難嗰時，想盡辦法為香港解決困難」，強調要「飲水思源」。今日我哋就講吓香港水資源問題。
香港本身擁有水塘，而喺大部份時間都唔缺乏淡水，更出現過水塘滿溢要將淡水傾倒入大海嘅事件。點解香港人會萌生「香港缺水」嘅印象都係源於上世紀60年代嘅一次因反常天氣而出現嘅較嚴重水荒。由個刻開始直至依家，香港人就一直用天價同中華人民共和國購入淡水，但其實香港嘅水資源係十分充足，東江水並唔喺中共恩賜。
隨住科技嘅進步，現代逆滲透海水化淡嘅效率越嚟越高，而成本就越嚟越低，甚至可以平東江水一半 [2]。近年，香港和黃集團旗下嘅和記水務喺以色列地投資興建大型逆滲透海水化淡廠，為當地提供安全而潔淨嘅飲用水，並且佔咗總淡水用量20%。另一方面，自2005年開始，屯門同鴨脷洲嘅海水化淡試驗廠就一直運作。所以香港其實係掌握有關嘅技術同人材，絕對係有能力而唔洗依賴中共。
其實香港「水資源緊張」係人為故意造成。香港原本可以發展到自給自足，但香港政府因為1960年代開始買東江水而停止擴建集水區同水塘。依家嘅香港集水區面積只係佔陸地面積嘅三分之一，但我哋可以參考下星加坡嘅集水區面積，自2011年起已經超過全國陸地面積嘅三分之二。另一方面，好多水塘已經被填平，例如七姊妹水塘、太古水塘、藍塘水塘、佐敦谷水塘及馬游塘水塘。另外，十塱水塘同愉景灣水塘就改做用嚟灌溉而唔係供應食水。黃泥涌水塘更加被改建成水上活動中心！所以香港「水源短缺」絕對係人為，亦令中共可以借東江水做大文宣，表示香港同支那係唔可以分離，香港要依靠中共打救先可以存活，要飲水思源。東江水係香港政府利用市民嘅錢以高價購入，一切只係交易。
睇返新聞，原來連建制派都支持興建化淡廠，尤其是係葛珮帆更一馬當先支持香港食水自主 [3]，減購東江水。即使中共真係截停供水諗住嚴懲香港人，但其實只係笑話。因為即使1963年香港大水荒嗰陣，全港水塘存水仍然夠市民飲用43日。按2016年數據顯示，如果鄰國突然截斷供水，保守估計香港水塘仍然可以供應香港市民飲用幾個月，而香港亦有時間由其他國家進口淡水。
總括嚟講，香港水資源依家係人為浪費，亦係香港政府故意唔去發展。如果重新擴建集水區、興建淡水湖、擴建水塘、轉用海水沖廁同修復破損滲漏淡水管呢啲措施，香港本地嘅飲用淡水唔單止可以自給自足，都可以擁有潔淨水源。大家唔好唔記得其實東江水受到嚴重污染，飲完身體有問題就真係比錢買難受。以天價購入東江水，又可以製造一個好理由比中共做統戰文宣，可見香港政府不斷浪費地球資源就係為咗去討好中國共產黨。
——————————————————————
除咗水資源，公社科嘅教學簡報仲提到公民身份，指即使拎住BNO 都係中國公民，並引用《國籍法》規定中國不承認公民具有雙重國籍。但其實喺1955年，中華人民共和國同印尼所簽訂《中華人民共和國和印度尼西亞共和國關於雙重國籍問題的條約》，條約容許喺印尼出生嘅華裔自由選擇中華人民共和國國籍或者印尼籍，以解決雙重國籍嘅問題。同呢個政策比，中華人民共和國唔容許香港人選擇中華人民共和國或者英國國籍係違反過往政策。而呢一方面我哋將會於星期六同大家慢慢探討。
資料來源：
[1] https://thestandnews.page.link/ngd5QyozCBrTXkzY7
[2] 圖二