有啲香港人選擇認同自己係所謂「中國人」嘅典型原因包括「佔領論」、「血統論」、「國籍論」同「華夏文化群體論」，但呢啲論調稍為用邏輯分析就站唔住腳。
————————————————————————
血統論者認為香港人具有華夏血統、遠祖(ancestry)同/或者世系(descent)，所以就係所謂「中國人」，而典型嘅主張就係「黑頭髪、黑眼晴、黃皮膚就係中國人」或者「大家都係炎黃子孫 / 龍的傳人」嘅謬誤陳述。
首先，香港人同北方人嘅基因事實上並唔相同。其次，血統論者訴諸唔相干嘅謬誤——相同血統同國民主觀選擇嘅身份認同並唔相干。英國人同美國嘅白人(大部份都係英國移民)都可以話係有相同嘅基因特徵，而北美十三州亦一度屬於英國殖民領土，但美國人喺獨立之前都唔認同自己係英國人。
————————————————————————
佔領論者認為因為依家香港俾中華人民共和國佔領，所以香港人無選擇嘅餘地，應該主觀認同係所謂嘅「中國人」。國籍論者就認為因為中華人民共和國國籍法加所謂嘅「中國籍」喺香港人身上，所以佢就係所謂嘅「中國人」。佔領論同國籍論嘅結合就係華夏族古代嘅「普天之下，莫非皇土，率土之濱，莫非王臣」封建思想！
中華人民共和國用武力威脅兼併香港本身已經係唔合法亦係不義，再加上香港人嘅「中國籍」並唔係按自由意志申請而獲得，亦唔能夠按自由意志放棄，所以佔領同國籍根本就缺乏自由意志而唔應該構成身份認同。況且，影響香港人嘅中華人民共和國國籍法都唔係由包含香港民選代表嘅國會通過，更加無香港立法機關嘅追認，完全係強加嘅橫蠻行為。佔領論者錯誤咁將土地嘅佔領同主觀嘅身份認同連繫一齊。事實上，土地俾邊個佔領同土地上嘅住民嘅主觀身份認同係無必然關係。第二次世界大戰嗰陣，法國俾德國佔領，但喺被佔領嘅法國人唔會認同自己係德國人，而仍然會認為自己係法國人，致力驅逐佔領者。
————————————————————————
華夏文化群體論者認為香港人係華夏文化群體之一(例如會慶祝華夏傳統節日、使用漢字、祭祀祖先等)，所以應主觀認同係所謂嘅「中國人」。
呢個係一種以偏概全嘅謬誤——忽視香港文化中慶祝西方節日、使用英語同其他歐美文化嘅元素。再講，香港文化亦都唔係以華夏大陸文化做主體，而事實上係嶺南海洋文化同西方海洋文化結合，去到近代更加加入咗唔少日本嘅海洋文化。我哋可以見到，認為香港屬於華夏文化群體係事實錯誤，誇大香港文化入面嘅華夏文化元素就係以偏概全。最後，屬於相同或者相似文化群體嘅人都唔一定有相同嘅身份認同，更加唔一定要結合成同一個國家。正如都係基督教文化或者伊斯蘭文化嘅人都可以有唔同嘅國家同唔同嘅國家身份認同，所以就算都係華夏文化地區(香港唔係)嘅人都可以有唔同嘅國家身份認同。
———————————————————————— 呢篇闡述咗香港嘅文化構成既係同華夏唔同，亦都同西方唔同，而係百粵嶺南文化同西方文擇優而取，結合而成嘅全新獨有文化。香港人獨有嘅英國國民(海外)國籍，無居留英國嘅功能，而新殖民人口係拎唔到呢個國籍。國籍本身嘅歷史意義同佢嘅獨特性質，意外咁防止咗大量背棄同胞嘅逃亡並且凝聚咗一個有幾百萬人嘅文化族群。香港粵英文化，同日本明治維新嘅脫亞入歐全盤西化相呼應，有如東亞之雙璧。