黨媒文匯報連續幾日報導親共各界意見，指以各種方式抵制立法會選舉嘅人都需要依法嚴懲 [1] [2]。作為其中一個被點名嘅組織，我哋有幾點需要補充：
首先，一個唔屬於人民嘅政府係絕對無資格得到香港市民任何一票。依家嘅選舉再唔係一個公平、公正、代表到香港民意嘅制度。連參選人都由港共篩選好，確保每個都愛國愛黨，成個選舉遊戲都由港共操控，近排仲積極進行宣傳、立法禁止公開呼籲其他人唔好投票或白票廢票，打壓要求社交媒體等移除相關內容。港共所做嘅一切都係想確保嚟緊嘅選舉有一定嘅投票率，而投票率正正就係佢哋可以肆意演繹嘅工具，等大家仲相信香港仍有民主，從而賦予選舉認受性。
親共各界都指出我哋嘅聯署違反《選舉（舞弊及非法行為）條例》，但好笑嘅係《選舉條例》同謀殺案一樣都無域外執法權。即係流亡緊、身處英國嘅我哋喺任何平台呼籲大家杯葛抵制選舉，佢哋都無能力以以上條例去告我哋。
如果港共覺得我哋犯咗宇宙國安法，有顛覆國家政權或者分裂國家嘅意圖，歡迎鄧炳強同李家超公開宣布，以免香港市民轉發呢個post誤墮法網。
最後，任何真正心繫香港嘅香港人都唔應該再為呢個政權抬轎，「不參選、不投票、不宣傳、不承認」所有港共所推崇嘅偽選舉。
資料來源：
[1] https://www.wenweipo.com/a/202111/01/AP617f009de4b0c0f6bc92d02b.html
[2] https://www.wenweipo.com/a/202111/03/AP61826583e4b0c0f6bc934eb9.html