【認清史實——身份認同】

已更新:2021年11月16日



喺雨傘革命之後,香港社會開始討論自決前途嘅問題,試圖突破以往嘅抗爭理論框架。 邏輯上,自認係「中國人」嘅香港住民係無法具備足夠理據去進行自決公投。雖然住民自決嘅原則對邊啲人有權自決有清楚定義。但喺政治層面而唔係法律嘅層面上考慮,關乎香港主權嘅公投究竟係由全體「中國人」公投,定單係由香港住民公投呢? 如果香港住民嘅身份認同係「中國人」嘅話,咁邊有理據有比其他「中國人」更多嘅權利(如公投自決權利),而成為具有特權、高過其他「中國人」一等嘅「中國人」呢?如果所有「中國人」都係平等咁香港都係所謂「中國」嘅一部份話,咁理所當然關乎香港主權嘅公投都係關乎所有「中國人」嘅公投,就應該由全體「中國人」公投。呢個所謂全體「中國人」或者係會包括中華人民共和國、中華民國、澳門同香港有中國藉嘅合資格選民。 同上面情況相反,如果香港住民嘅身份認同係「香港人」而唔係「中國人」嘅話,咁香港人就有同中國人唔同嘅權利係好正常,而決定香港主權嘅公投就必定係由香港合資格選民公投決定。 觀乎古今中外嘅歷史,以至全球依家喺度爭取獨立嘅地區,所有主權獨立嘅行動都係由於某啲地區嘅住民首先唔認同本身係佔領國嘅國民,之後先會發起行動尋求獨立。 如果某啲地區嘅住民認同本身係佔領國國民嘅一部份,咁任何爭取權益嘅行動只係國內嘅政治問題,而爭取嘅成果亦同時係同全國嘅國民共享。 —————————————————— 香港住民如果要認同本身係香港人而唔係中國人,就必須意識到香港人同中國人之間嘅區別,而呢種區別唔係喺法律上,而係文化、意識形態、價值觀同生活習慣上嘅區別。如果香港人認同本身係文化、意識形態同生活習慣上都同中國人唔同,認同香港有獨立嘅香港文化,同中華文化有好大程度分別,就會認同自己係「香港人」嘅身份。相反,如果香港人否認本身喺文化、意識形態同生活習慣上同中國人唔同,同中華文化並無好大程度嘅分別,就會認同自己係「中國人」。 政治論述、理念或者哲學可以講得冠冕堂皇,甚至吹噓理想烏托邦,但當要實行有關嘅信念嗰陣,往往就要變成清楚、詳細同理性嘅法律條文先可以真正執行。喺立法過程之中,透過理智嘅辯論往往會揭露某政治論述係無法實行嘅幻想。上世紀嘅共產主義用千萬人性命作為代價去進行巨型實驗,證明咗係無法實行嘅烏托邦幻想。 世界各國有唔同嘅國籍法,目的就係要用法律條文去清楚界定邊個人會被視為嗰啲國家嘅國民。換句話講,國籍法就係用法律嘅語言去區分國民同外國人。由於各國界定國民嘅國籍法都唔一樣,所以邏輯上一個人可能同時係兩個或以上國家嘅國民,亦即係雙重國籍或者多重國籍,又或者邏輯上唔符合世界上任何一個國家嘅國籍法而無國籍。 —————————————————— 以一個人嘅血統去界定係咪屬於本國嘅國民,呢樣叫做「屬人主義」或者「血統主義」(Jus sanguinis);以一個人嘅出生地去界定係咪屬於本國嘅國民,呢樣叫做「屬地主義」或者「出生地主義」。有啲國家嘅國籍法係偏向屬人主義,亦都希啲國家係偏向屬地主義,但兩者混合嘅國家亦有不少。 採用「屬人主義」嘅國家例子唔少,其中包括日本同以色列。 日本嘅國籍法基本上係屬人主義。如果嬰孩喺出世嗰陣父親或者母親係日本國民,或者出世嗰陣已故嘅父親係日本國民,嗰個嬰孩先會係日本國民。新生嬰孩按屬地主義而取得日本國籍係一個例外情況:如果父母其中一方嘅國籍不明或者屬於無國籍,咁喺日本境內出生嘅嬰孩就會擁有日本籍。呢項屬地主義嘅例外情況係因應聯合國《減少無國籍狀態公約》嘅要求而特別訂立。另外,外國人喺出世之後都可以喺符合法定條件後歸化日本籍。 擁有一定人口同擁有較悠久歷史文化嘅國家一般會採用「屬人主義」,用意係唔希望有大量有外地背景嘅新出世人口以保護本國單一文化同族群構成,並且唔需要更多嘅常住人口,甚至本國嘅常住人口都已經過多。另一方面,有移民傳統嘅多元文化國家一般會採用「屬地主義」,亦即係只要求自然人喺國境出世就得,係最為對外開放嘅做法。呢種做法嘅用意係鼓勵新出世人口以增加嗰個國家所缺乏嘅常住人口,以提供長遠嘅人力資源作開墾同防衛。 若果結合「屬人主義」、「屬地主義」同多重國籍一併考慮嘅話,唔准許國民擁有雙重國籍、要求嬰兒的出生地係本國、父母雙方都有本國國籍新生嬰孩先可擁有或者維持該國國籍嘅國籍法,就屬於最保護本國原有族群構成嘅做法。 ——————————————————

每一個國家嘅國民都有權自由選擇接納邊個係本國國民,並且自由決定本身嘅國民構成同文化。喺民主社會入面,民選議會將代表國民嘅意願反映喺國籍法之中更加係文明嘅表現。以上已經闡釋按照父母國籍而決定新生嬰兒係咪本國國民係有佢嘅恰當原因,所以唔可以算係「歧視」或「排外」。 世上大部份國家都會有相類似嘅條件。正如人同人之間自由選擇朋友或者情人一樣,國家定下接納國民嘅條件係好正常。又正如大部份人嘅居所面積有限,唔可以無限地接納其他人進入居住一樣。世界上,無任何條件就俾外國人入藉同居留嘅地方係幾乎唔存在。

20 次查看0 則留言

最新文章

查看全部